Текст пісні Futhorck - Heilung

Futhorck

Feoh byþ frofur fira gehwylcum;
Sceal ðeah manna gehwylc miclun hyt dælan
Gif he wile for drihtne domes hleotan
Ur byþ anmod ond oferhyrned
Felafrecne deor, feohteþ mid hornum
Mære morstapa; þæt is modig wuht
Ðorn byþ ðearle scearp; ðegna gehwylcum
Anfeng ys yfyl, ungemetum reþe
Manna gehwelcum, ðe him mid resteð
Os byþ ordfruma ælere spræce
Wisdomes wraþu ond witena frofur
And eorla gehwam eadnys ond tohiht
Rad byþ on recyde rinca gehwylcum
Sefte ond swiþhwæt, ðamðe sitteþ on ufan
Meare mægenheardum ofer milpaþas
Cen byþ cwicera gehwam, cuþ on fyre
Blac ond beorhtlic, byrneþ oftust
Ðær hi æþelingas inne restaþ
Gyfu gumena byþ gleng and herenys
Wraþu and wyrþscype and wræcna gehwam
Ar and ætwist, ðe byþ oþra leas
Wenne bruceþ, ðe can weana lyt
Sares and sorge and him sylfa hæfþ
Blæd and blysse and eac byrga geniht
Hægl byþ hwitust corna; hwyrft hit of heofones lyfte
Wealcaþ hit windes scura; weorþeþ hit to wætere syððan
Nyd byþ nearu on breostan; weorþeþ hi þeah oft niþa bearnum
To helpe and to hæle gehwæþre, gif hi his hlystaþ æror
Is byþ ofereald, ungemetum slidor
Glisnaþ glæshluttur gimmum gelicust
Flor forste geworuht, fæger ansyne
Ger byÞ gumena hiht, ðonne God læteþ
Halig heofones cyning, hrusan syllan
Beorhte bleda beornum ond ðearfum
Eoh byþ utan unsmeþe treow
Heard hrusan fæst, hyrde fyres
Wyrtrumun underwreþyd, wyn on eþle
Peorð byþ symble plega and hlehter
Wlancum, ðar wigan sittaþ
On beorsele bliþe ætsomne
Eolh-secg eard hæfþ oftust on fenne
Wexeð on wature, wundaþ grimme
Blode breneð beorna gehwylcne
Ðe him ænigne onfeng gedeþ
Sigel semannum symble biþ on hihte
Ðonne hi hine feriaþ ofer fisces beþ
Oþ hi brimhengest bringeþ to lande
Tir biþ tacna sum, healdeð trywa wel
Wiþ æþelingas; a biþ on færylde
Ofer nihta genipu, næfre swiceþ
Beorc byþ bleda leas, bereþ efne swa ðeah
Tanas butan tudder, biþ on telgum wlitig
Heah on helme hrysted fægere
Geloden leafum, lyfte getenge
Eh byþ for eorlum æþelinga wyn
Hors hofum wlanc, ðær him hæleþ ymb
Welege on wicgum wrixlaþ spræce
And biþ unstyllum æfre frofur
Man byþ on myrgþe his magan leof:
Sceal þeah anra gehwylc oðrum swican
Forðum drihten wyle dome sine
Þæt earme flæsc eorþan betæcan
Lagu byþ leodum langsum geþuht
Gif hi sculun neþan on nacan tealtum
And hi sæyþa swyþe bregaþ
And se brimhengest bridles ne gym
Ing wæs ærest mid East-Denum
Gesewen secgun, oþ he siððan est
Ofer wæg gewat; wæn æfter ran;
Ðus Heardingas ðone hæle nemdun
Eþel byþ oferleof æghwylcum men
Gif he mot ðær rihtes and gerysena on
Brucan on bolde bleadum oftast
Dæg byþ drihtnes sond, deore mannum
Mære metodes leoht, myrgþ and tohiht
Eadgum and earmum, eallum brice
Ac byþ on eorþan elda bearnum
Flæsces fodor, fereþ gelome
Ofer ganotes bæþ; garsecg fandaþ
Hwæþer ac hæbbe æþele treowe
Æsc biþ oferheah, eldum dyre
Stiþ on staþule, stede rihte hylt
Ðeah him feohtan on firas monige
Yr byþ æþelinga and eorla gehwæs
Wyn and wyrþmynd, byþ on wicge fæger
Fæstlic on færelde, fyrdgeatewa sum
Iar byþ eafix and ðeah a bruceþ
Fodres on foldan, hafaþ fægerne eard
Wætre beworpen, ðær he wynnum leofaþ
Ear byþ egle eorla gehwylcun
Ðonn fæstlice flæsc onginneþ
Hraw colian, hrusan ceosan
Blac to gebeddan; bleda gedreosaþ
Wynna gewitaþ, wera geswicaþ