Текст пісні Papst & Spekulant - Tommy Vercetti, Dezmond Dez

Papst & Spekulant

Eui Heiligkeit, i fass' mi eilig i dr Hoffnig dassmer einig wärdä
Mir stärbä aui z schnäu u doch wäut mä dr steinig Wäg
Und d Chilä ganz ä bsungerä
Au di luschtvoue Wunder lö Verluschte nid verwunderä
Börse schliesse täglech, aber Gott isch nüm so schlüssig
U dir riich a Kathedrale, aber Stei isch nid so flüssig
Darum bieti Euch ä Priis für di sixtinischi Kapäuä
I inveschtier' mis Gäud u dir missionieret d Wäut
Di liquide Mittle fählä, drum beschliessemer ds Gschäft
Aber nid zum Missioniere — zmingscht nieme mitem Schwärt
Setzä Gloube id Verdouig, i mein' gopferdeli:
Was isch ä Botticelli gägä hundert gstopfti Bellys?
So dient’s denä mit Milliarde aus ä Mahnig
Und dä arme Milliarde au di Farbene aus Nahrig
Dr Fisch chasch nur ässe, wennd verzichtisch ufe Glanz
U drum handli aus di erschti wahri unsichtbari Hand
Begehrnisse z stiue mues nid d Chiuche verbueche
Solang d Seele drhinger Gottes Wiue vermuete
Deal isch Deal, du bisch luschtig — i säg' iz eifach Du
Weisch, wär d Siuberlinge isteckt, dä mues läbä aus dr Jud
I mein', i cha dir nid verüble, dass du d Münze akzeptiersch
Wasi a di zahle, hani säuber 10-fach akzeptiert
Gäud regiert d Wäut u Gottes Tod isch nüt Neus, doch
Dr Bewiis isch ändgültig: aues isch chöiflech
Im Gägäteil: nüt isch ändgültig, mir au nämä teil
Am Prozäss wo jeder' Gäutig erschs Läbä leiht
I sägä: ei Mönsch längt wo «Nä-ä» seit
Dass dis intellektuelle Gebäude i sich zämägheit
Und dr Siuberling z nä, isch kes Hindernis um ar Stägä obe azcho
Wär zämä teilt wird ä Rägeboge-Farb
Mir opferä d Kapäuä u mache Brot us Steine
Wüu ersch we Gott tot isch, chaner sich aune zeige
Wi lächerlech! Iz wosch mit Wunder ufe Hunger los
Für di gliiche Lüt wo dir sit zwölf-hundert Jahr heit ungerdrückt
Bättä tönt wi Bättlä mitme Ungertan-Ungerton
Dir sit nume Scharlatan mit Salomon-Stundelohn
Arbeitsteilti Religion — ds Faschte usglageret
Und aues Blasphemie, was Eui Macht hingerfragt
So luschtig! I ha zersch dänkt, du redsch vo Euch
Offesichtlech heit dir bishär üses Erbe nid bereut
Gägä Gott vom Kapitau isch zwar Jesus nur ä Gnom
U doch beidi nur ä schrankelosi Herrschaft vo Phantom
I eune rationale Gründ gse mir nur kapitali Sünde
I euem legitime Zins nume surreali Pfründ
Gäg d Natur, gägä ds Zäme, gägä d Freud, gägä ds Läbe
I eune Testament steit: dir heit ds Neue nid gläse
Ach Hüchler! Dä Arme lüchte nur Armlüchter
We viu Läbensmittu choufsch, wärdä aui sofort tüürer
Dir chöit schön am Tag häufä, si wärdä geng ir Nacht früüre
Du bisch Jesus i dr Wüeschti — z’lescht doch no verfüehrt
We du ds Heilige zum Mittu, de machsch Steine zu Güetzi
Ds isch Frässä über ds Wort, ds isch ändlech ds Opfer
Wo em Chrischtetum nie glingt u doch grundsätzlech innewohnt
Wenn d Nützlechkeit ire Sieg hinwägtreit über Gott
Eui Nützlechkeit isch s grössers Märli aus ds Jüngschte Gricht
Heit nümme gmein mit eim wo mit 15 Stei glücklech isch
Früecher isch eui Gier mau dr Atrieb gsi vor Ziit
Hüt suugt Rändite no Profit us — ä Vampir ä Vampir
Du wirsch sündefrei we dini Seele ds Böse widerrüeft
Doch Gott het d Kreatur nid gschaffe, wo zur Börse het verfüehrt
Ob Arbeit oder Rohstoff, Patent oder Ligeschaft
Räntä isch ds Kommando wo uf kem Wäg i Himmu fahrt
Kalkül isch ke Vernunft, Krise ke Effizienz
Heit’s gloub ändgültig verspiut mit dr Legitimität
Virtuelli Gäudbärgä, Versprächä wiit wäg vor Realität
Zerstöre d Wäut wägere Inflation vo Säubschtwärt
Dä Gläubiger dr Himmu, dä Glöibige nur Hunger
Dini Chiuche füehrt absurdum, was mini het erfunge
Puh … i würd ja nid mau widersprächä
Ä zerbrösmeleti Hostie chasch nid widr verbräche
Sitme rächnet mit dr Höu chasch dr Himmu geng versprächä
Und no-ä-mau und no-ä-mau mit himmlische Prozänt
Hüt bruucht dr Schöpfer nümme Wörter, Gott isch nur i Adams Hirn
Und ds Gäud dr läär Ruum zwüsche usgstreckte Finger
Wi o immer — wär kämpft scho mit demäntä Kontrahänt
I verbrönnä di Kapäuä, und ds längt aus Argumänt
Scho denn wachst ds Wärch usem Banke-Cash u drum gseni ke
Transzendänz i dä Schwanz-Ersätz vo dä Medicis
Ds Wort längt aus Sunne, chasch ds drunger gärn dä Flamme la
Gott het nur aus Wunsch Sinn, Kunscht nur aus es Mandala
Sohn, las la bambele, machs chli wine Pandabär
Niemer müesst i Pfandverleih, wenn ds Läbe ä Veranda wär
U niemer wäri schandbefläckt, hätt Paulus mau Lambada tanzt
Ds Glück läbt i Gruppe u treit Affeschwanz
Dass Gäud aues ungerwirft, chasch o du nid bestimme
Vor auem wenn du dis bruuchsch zum es Argument gwinne
Und unger üs: unger schöne Wort und fette Stundelöhn
Simer beides jensitigi Nuttesöhn — Gruess!